Во моментот кога изгледа дека OpenAI го освои светот, на сцената се појавува играч кој се потпира на нешто друго, не само на моќта на моделите, туку и на моќта на масите. Американскиот AI-пребарувач Perplexity, кој сѐ почесто се позиционира како алтернатива на Google и ChatGPT, токму сега го објави можеби најамбициозниот потег на годината: стратешки сојуз со индискиот телекомуникациски гигант Bharti Airtel.
Perplexity и бесплатен пристап
Ова партнерство значи дека дури 360 милиони корисници ќе добијат бесплатен пристап до Perplexity Pro, услуга што инаку чини 200 долари годишно. Иако на прв поглед ова делува финансиски неисплатливо, целта е сосема јасна: да се освои дигиталниот пазар и на тој начин да се избегнат доминантните играчи.
„Индија е можност што не можеме да ја игнорираме“, изјави основачот и извршен директор на Perplexity, Аравинд Сринивас. Освен партнерството со телеком операторите, стартапот воспостави соработка и со финтек платформата Paytm, со цел дополнително да го прошири своето присуство во секојдневните дигитални навики на корисниците, пренесе TechCrunch.
Резултатите не изостанаа. Во вториот квартал од 2025 година, бројот на преземања на Perplexity апликацијата во Индија се зголеми за 600%, а бројот на активни корисници за 640%. Иако ChatGPT сѐ уште води по вкупен број корисници, Perplexity бележи најбрз раст и веќе има повеќе активни корисници во Индија отколку на кој било друг пазар.
Во основата на оваа стратегија лежи едноставна пресметка: корисниците во Индија можеби нема веднаш да плаќаат, но базата е толку голема што дури и најмала конверзија во иднина може да донесе сериозни приходи. Покрај тоа, Индија е пазар со мала локална конкуренција во областа на генеративниот AI, што му овозможува на Perplexity простор за експериментирање и доминација.
Особено е интересно што Perplexity не се фокусира само на приходи, туку и на позиционирање. Додека OpenAI ги лиценцира и монетизира своите модели на глобално ниво, Perplexity оди по патот на директна дистрибуција и локални партнерства, дури и по цена на побавна монетизација.
Секако, се поставува прашањето за одржливост. Во вториот квартал од 2025 година, OpenAI оствари приход од 773 милиони долари, додека Perplexity инкасираше само осум милиони. Но, ако стратегијата во Индија успее и послужи како модел за други земји во развој, таа разлика може брзо да се намали.
За сега, Perplexity игра на долги патеки. А Индија, со својата комбинација од популацијата, дигиталната писменост и отвореност кон нови технологии, може да биде токму таа карта што ќе го промени текот на трката во вештачка интелигенција. Во секој случај, јасно е дека во светот на AI бројот на корисници сѐ почесто значи предност на пазарот.
Извор: web-mind.rs
